LAS FLAMAS DE LO FOGARIL

21.09.2014 09:08

Las flamas de lo fogaril

1981

 

Veremundo Méndez Coarasa

―grupo “VAL D’ECHO”―

(Del Álbum “Subordán”)

 

 

Una nuey, recién cenaus,
mirando las flamas yeran,
prexinando cada cual
u pensando a su manera,
rodiando lo fogaril
toda una familia entera,
en aquella nuey d'ivierno
que l'ausín chiflaba fuera,
chelando a la nieu que empliba
los telláus y las carreras.


Yeran bien aposentáus
en dreita y zurda cadiera,
y, cara a cara lo fuego, 
bellos en escamilletas
escuitando, que lo güelo
fablaba d'estas maneras:

 

(lo güelo)
- A mí, porque ya só viello,
muita vida no me queda;
pero a estos fogaríls
y polidas chamineras,
que por cientos las añadas
todas, u cuasi, las cuentan,
a morir son condenadas,
como yo, por estar viellas.

La vida que ve trayendo
con lo tiempo cosas nuevas,
fa aquí, como en otros puestos,
que muitas cosas se pierdan:

 

(jota)
Ya se´n fueron las gorgueras,
levan calzóns cuatro viellos,
ya se´n fueron las gorgueras,
rondas no'n sientes dinguna,
¡lo tañer ye una fatera!


¿bailar la jota? ¡soniando!:
ixo, antis más, diz que feban.
Albadas y palotiaus,
romances y sobremesas
iz que cien años ta zaga
aqui'n lo lugar bi-n-heba.

 

Ya no tartié más lo güelo;
miré lo fuego que ardeba 
y lo altas que puyaban
las flamas la nuey aquella.
Poco a poco se apagueron
como si s'hesen dau cuenta 
de lo que d'ellas fablaba
y s'hesen muerto ¡de pena!